Dramatismo en tempos ledos (Doarquivo_15, día cincuentaseis)



Saio e vexo o ceo. O ceo non é azul nin gris. Pregúntome se será o mesmo que vin por derradeira vez a mañá que entrei aquí. Ese día era ben azul, incitando a toda a poboación a deixar as súas preocupacións pra se ir entregar ao manso lecer da praia. Porén, eu tiven que entrar aquí. E entrei. 
Dende aquela, o ceo xa non se volveu a mostrar aos meus ollos. Cicais si o intentou, buscando desesperado unha xanela dende onde me berrar que fose admirar o espectáculo rosáceo do solpor ou suplicando que limpase as súas bágoas co meu paraugas vello. Mais, de ser así, eu nada vin, nada escoitei e nada sentín. De certo, pouco podía sentir máis que a doce coitelada do recordo que me producía ese último adeus do ceo azul, da xente que ía ir a entregarse ao lecer da praia, da liberdade. E agora, no momento que saio de alí, atopo que o ceo xa non é do azul que me amostrara tantas veces, pero tampouco me está a recibir co gris choroso polo prolongado loito da ausencia. Por iso, estou a me preguntar se realmente este é o mundo do que saín aquela mañá. Do que saín esta mañá. Deus, como custan as clases dos venres.

PD: o faio recorda que todo isto xurdiu a partires da cor do ceo ao saír da estación, foi un traxecto entretido (eeeh, si, eran boas clases).


Comentarios

Publicar un comentario

Publicacións populares deste blog

Follas virtuais (das notas do caderno dixital, 1)

Estas follas virtuais están permanentemente manchadas polas verbas que escribo e borro, unha e outra vez. Malia que a simple vista non se vexa, este teléfono ten memoria de todo o que nesta páxina se escribiu antes de mostrar o texto definitivo:  todos os fonemas que conxuguei en van e todas as ideas que desbotei e que levarían este texto de seguro por outros camiños. Pensándoo ben, este dispositivo tivo nalgún punto acceso a esa información e é capaz de ver a tempo real todos os meus erros, as miñas dúbidas, o que considero que é válido e o que non. Recorda iso? Coñéceme? Sabe da tristeza que plasmo ás veces, das miñas frustracións que dou en repetir unha e outra vez en todo o que escribo? Sabe do meu entusiasmo pasaxeiro, das cousas que me dán ledicia e que me empuxan a querer seguir a esforzarme? Sabe do amor que sinto con tanta intensidade? Dalgún xeito, é certo: estou forzando estas páxinas a recordar. Recordar todo o que son, todos os proxectos que, inda sendo desbotados, com...
Ler máis

A vitoria de Atlas

nun intre, a miña vida cambiou.  Erguinme por fin dun letargo que se alongou moito máis do debido, e pisei o chan inda húmido polas bágoas que caeran durante tantos anos dos meus ollos.  Camiñei, e o meu corpo sentiuse lixeiro ao liberarse do mundo que cargaba ás costas. Ao esvarar de volta co verdín das pedras, decateime de que os meus movementos, torpes e desincronizados, seguían a ser os mesmos que deixara atrás pola aceptación dunha eterna derrota. Pouco podía entender agora como chegara a pensar iso; como se me podía ter metido no maxín que a miña existencia estaba inherentemente unida ao fracaso de quen nunca o ía intentar.  ... Deixei inconcluso este texto tempo atrás, mais figúraseme agora que é unha boa maneira de que o faiado deixe ver as súas novas memorias, que tanto tempo estivo a gardar.  (eeeeh si,benvidxs de volta!).
Ler máis

Un xoves na habitación...

Fico soa nesta noite escura que arrodea a miña pequena habitación. É nestes momentos cando me imaxino camiñando polas estreitas rúas de Compostela nesa hora na que moitos peregrinos xa se foron buscando as estafas dalgún hotel. Maxino, pois, esa pedra antiga aloumiñando a palma da miña man, mentres algún dos compañeiros dos que me vexo acompañada contan incríbeis historias que rematan cunha acompasada gargallada que alumea máis que as farolas que se atopan en Mazarelos (pequena pausa para deixar un comentario:mimadriña canta oración subordinada). Nesa agradable imaxe consigo seguir ben esperta nesta noite escura que arrodea a miña habitación. Mais fico soa e o sono acaba por gañar aos meus desexos de ir saudar a luz do luar nesta descoñecida cidade. Algún día (penso) conseguirei unha vitoria. Mais polo de agora hei seguir a procurar eses risos de lúa chea neste vello faiado... (ehhhhh, si?)
Ler máis