Diario dun breve espazo do día, titulado ao día seguinte

 

DÍA UN,  23:15

Esta escrita é só un intento máis de expresar o que intento ser. Digo intento porque non o son, e de aí que agora fiquen no papel estas verbas. E cantas veces as teño empregado neste mesmo soporte...

(...)

DÍA UN (pero con paréntese), 23:19

(Ti non o podes saber, porque só os meus dedos coñecen o que están a borrar. Miña cabeza sabe o que pensa, pero non recorda o que borra. E é tanto a borrar...)

...

DÍA UN (de novo sen paréntese... Merda.), 23:24

Borraría todo o que eu son? De facelo, tampouco daría para unha hipérbole....Pero non, non o faría. Antes que valente, son covarde. 

...

DIA UN, 23:44

De borrar algo, sería a envexa. Corre por dentro do meu corpo coma un dos ratos que habita o antigo cortello da nosa casa, enchéndoo dun veleno que seca a miña boca e endurece o meu perdido ollar ao mundo. E entón sinto noxo, non polas persoas sobre as que recae o meu sentimento, senón por min mesma. Son egoísta ata para iso, que se lle ha facer.

(...)

DÍA UN, (volta aos parénteses), 23:50

(Frústrame o feito de escribir coma un impulso da propia frustración, supoño que era esperable. Ti sabes que eu son esperable... Por que me esperas?).

...

DÍA UN, 23:53

A esta escrita non lle resta moito tempo, pois o día está a acabar e de facelo antes de que remate o texto perdería a pouca graza que pode ter. Sempre escribindo ás carreiras... Non existía o freno da man?

...

DÍA UN, 23:57

O meu peito négase a parar de escribir: tantas cousas das que falar, tantas cousas que borrar.... Mais non, non hei seguir agora. Tres minutos son pouco tempo para cambiar se non se quere.

...

DÍA UN, 23:59

Antes que valente, son covarde. 

(Grazas por esperarme)


PD: o faiado leva para reformarse moitos anos e aquí segue. E, ao final, é esa a enteira causa de que existan estas memorias.


Comentarios

Publicar un comentario

Publicacións populares deste blog

Follas virtuais (das notas do caderno dixital, 1)

Estas follas virtuais están permanentemente manchadas polas verbas que escribo e borro, unha e outra vez. Malia que a simple vista non se vexa, este teléfono ten memoria de todo o que nesta páxina se escribiu antes de mostrar o texto definitivo:  todos os fonemas que conxuguei en van e todas as ideas que desbotei e que levarían este texto de seguro por outros camiños. Pensándoo ben, este dispositivo tivo nalgún punto acceso a esa información e é capaz de ver a tempo real todos os meus erros, as miñas dúbidas, o que considero que é válido e o que non. Recorda iso? Coñéceme? Sabe da tristeza que plasmo ás veces, das miñas frustracións que dou en repetir unha e outra vez en todo o que escribo? Sabe do meu entusiasmo pasaxeiro, das cousas que me dán ledicia e que me empuxan a querer seguir a esforzarme? Sabe do amor que sinto con tanta intensidade? Dalgún xeito, é certo: estou forzando estas páxinas a recordar. Recordar todo o que son, todos os proxectos que, inda sendo desbotados, com...
Ler máis

A vitoria de Atlas

nun intre, a miña vida cambiou.  Erguinme por fin dun letargo que se alongou moito máis do debido, e pisei o chan inda húmido polas bágoas que caeran durante tantos anos dos meus ollos.  Camiñei, e o meu corpo sentiuse lixeiro ao liberarse do mundo que cargaba ás costas. Ao esvarar de volta co verdín das pedras, decateime de que os meus movementos, torpes e desincronizados, seguían a ser os mesmos que deixara atrás pola aceptación dunha eterna derrota. Pouco podía entender agora como chegara a pensar iso; como se me podía ter metido no maxín que a miña existencia estaba inherentemente unida ao fracaso de quen nunca o ía intentar.  ... Deixei inconcluso este texto tempo atrás, mais figúraseme agora que é unha boa maneira de que o faiado deixe ver as súas novas memorias, que tanto tempo estivo a gardar.  (eeeeh si,benvidxs de volta!).
Ler máis

Un xoves na habitación...

Fico soa nesta noite escura que arrodea a miña pequena habitación. É nestes momentos cando me imaxino camiñando polas estreitas rúas de Compostela nesa hora na que moitos peregrinos xa se foron buscando as estafas dalgún hotel. Maxino, pois, esa pedra antiga aloumiñando a palma da miña man, mentres algún dos compañeiros dos que me vexo acompañada contan incríbeis historias que rematan cunha acompasada gargallada que alumea máis que as farolas que se atopan en Mazarelos (pequena pausa para deixar un comentario:mimadriña canta oración subordinada). Nesa agradable imaxe consigo seguir ben esperta nesta noite escura que arrodea a miña habitación. Mais fico soa e o sono acaba por gañar aos meus desexos de ir saudar a luz do luar nesta descoñecida cidade. Algún día (penso) conseguirei unha vitoria. Mais polo de agora hei seguir a procurar eses risos de lúa chea neste vello faiado... (ehhhhh, si?)
Ler máis